Лекарите апелираат на опасностите од новиот „ТикТок“ предизвик со парацетамол
Информацијата за МИА, денеска (10 феврауари) ја потврди директорот Андон Чибишев, кој и самиот алармираше на претпазливост во врска со овој предизвик.
„Нова опасност им се заканува на нашите деца. Експериментот со „парацетамолот“ е исклучително опасен и може да заврши со тешко неповратно оштетување на црниот дроб или смрт. Токсичната доза изнесува 5 до 15 грама или 10 до 30 таблети од 500 милиграми или леталната - смртна доза е 20-25 грама“, напиша Чибишев неодамна на „Фејсбук“.
Појасни дека труење настанува заради исцрпување на метаболичкиот систем на црниот дроб и ги повикува надлежните институции внимателно да ја следат состојбата.
За кобните последици што може да ги има предизвикот, се огласи и доктор Нико Беќаровски од истата Клиника.
„Од почетокот на оваа година, на платформата „ТикТок“ кружи нов многу опасен предизвик меѓу младите, внесување големи дози „парацетамол“. Почитувани, колку и да звучи чудно, труењата со „парацетамол“ се меѓу најсмртоносните труења со лекови. Дури и мали дози 10-15 таблети предизвикуваат оштетувања на црниот дроб. 20-40 таблети предизвикуваат сериозни труења и оштетувања на црниот дроб, а труењата со над 50 таблети многу често завршуваат со смрт, дури и при интензивно лекување“, подвлече Беќаровски.
Ако сепак се случи труење, а не се поминати 2-4 часа, Беќаровски советува веднаш да се дадат 10 таблети медицински јаглен и АЦЦ - 2 кесички и да се побара лекарска помош.
Последниот предизвик на платформата Тик-ток, наречен„Супермен“, ги предизвикува децата да скокнат имитирајќи го истоимениот херој. Поради овој предизвик, најмалку единаесет деца на почетокот на декември минатата година завршија во градската болница во Скопје. Повеќето со набиеници, а две од нив завршиле и со скршени раце.
Министерот за дигитална трансформација Стефан Андоновски тогаш изјави дека државата не смее да биде таа што постојано ќе забранува апликации и со тоа ќе ги наруши демократските принципи на општеството. Тој рече дека веќе е изработено упатство насочено кон сите наставници во сите училишта, основни и средни, да поразговараат со децата, со учениците за предизвиците на социјалните медиуми.