Таравари: На ГОБ „8 Септември“ треба да и се дадат повеќе ингеренции
„Мислам дека „8 Септември“ треба да остане како и досега, добар „бекап“ за Клинички центар, нагласи министерот“, одговарајќи на новинарски прашања по официјалното пуштање во употреба на компресорската станица за хируршките клиники.
На прашање до кога ќе биде паузирана изградбата на нов клинички центар, тој одговори дека за 2025 нема таков план.
„За 2026 ќе зборуваме и ќе ви кажиме доколку има нешто конкретно“, рече Таравари.
Деновиве и директорот на Фондот за здравствено осигурување Сашо Клековски најави дека Владата размислува да ја стави во мирување иницијативата за изградба на нов Клинички центар, а наместо тоа Градската општа болница „Осми септември“ да стане регионален центар за лекување на пациентите од Скопје, Куманово и Велес.
Нов клинички центар најавија неколку претходни влади, но ниту една досега не почна да го гради. Како алтернативно решение владата на Мицкоски го предлагаше спојувањето на клиниките во рамки на Клиничкиот центар во Скопје.
Одговарајќи на новинарско прашање за условите во болницата во Штип, министерот Таравари рече дека не само таа, туку сите болници биле оставени такви како што биле. Изрази надеж дека по јуни ќе се почне со проект за реновирање, односно нови болници во Штип и Кичево.
„Оваа година, во план ни се четири болници за да започнеме. Струмица, „Свети Еразмо“, Кичево, Штип. Овие ни се во план за оваа година и реновирање на оддели и тука на Клинички, но и на други болници“, одговори тој на прашањето кога може да се очекуваат подобрени услови.
Министерот рече дека е оптимист барем таа во Струмица и „Свети Еразмо“ да бидат завршени до крајот на оваа година, а новите болници во Штип и Кичево да бидат готови барем за две години.
Инаку, по десетдневно тестирање, министерот за здравство Арбен Таравари денеска (10 феврауари) информираше дека официјално е пуштена во употреба новата компресорска станица за хируршките сали во Клиничкиот центар.
Хируршките сали беа затворени во мај минатата година, откога се појави силна смрдеа во дистрибутивната мрежа за кислород и компримиран воздух. Тие летово функционираа со намален капацитет, а работеа со надворешни компресори.