Најмалку десет мртви во уривање на зграда во Каиро

Десет лица загинале, а осум биле повредени кога се урнала зграда во главниот град на Египет, Каиро, јавија државните медиуми.


На местото на настанот во работничката населба Кердаса во Гиза биле испратени возила на брза помош. Таму тимовите за цивилна заштита трагаат по исчезнатите под урнатините, пишува весникот „Ал-Ахбар ал-Јум“, а пренесе АФП.


Очевидци за весникот изјавија дека колапсот бил предизвикан од „експлозија на плинска боца“ и дека истрагата на полицијата е во тек.


Градежните прописи нерамномерно се применуваат и се спроведуваат во Каиро, каде живеат повеќе од 26 милиони жители.


Во изминатите години, египетската метропола беше сведок на неколку фатални уривања на згради, во некои случаи поради дотраената состојба на некои од нив, а во други поради непочитување на градежните прописи.