Израел го стопира влезот на помош во Појасот Газа
Хамас, кој САД, Европската Унија и другите земји го прогласија за терористичка организација, го обвини Израел дека се обидува да го наруши кревкиот прекин на огнот и реагираше дека одлуката на Израел да ја прекине помошта е „евтина изнуда, воено злосторство и бесрамен напад на договорот“.
Првата фаза од прекинот на огнот меѓу Израел и Хамас, која вклучуваше зголемување на хуманитарната помош, истече вчера, 1 март.
Двете страни допрва треба да преговараат за втората фаза во која се очекува Хамас да ослободи десетици преостанати заложници во замена за повлекување на Израел и траен прекин на огнот.
Израел претходно истиот ден соопшти дека го поддржува предлогот за продолжување на првата фаза од прекинот на огнот до Рамазан и Пасха, односно до 20 април. Во соопштението се вели дека предлогот дошол од пратеникот на администрацијата на Трамп за Блискиот исток, Стив Виткоф.
Според предлогот, Хамас ќе ослободи половина од заложниците првиот ден, а останатите кога ќе се постигне траен договор за прекин на огнот, соопшти кабинетот на израелскиот премиер Бенјамин Нетанјаху.
Засега нема коментар од САД, Египет или Катар, кои посредуваат меѓу Израел и Хамас повеќе од една година.
Војната во Газа започна со нападот на Хамас врз Израел на 7 октомври, кој резултираше со смрт на 1.218 луѓе, од кои повеќето цивили, според извештаите на АФП.
Во израелската офанзива што следуваше понатаму, пак, загинаа повеќе од 48.000 луѓе во Газа, од кои повеќето цивили, според Министерството за здравство во овој појас под контрола на Хамас.