Американски носач на авиони пристигна во Јужна Кореја
Пристигнувањето на „УСС Карл Винсон“ во јужнокорејското пристаниште Бусан има за цел да ја демонстрира цврстата американско-јужнокорејска воена алијанса наспроти постојаните севернокорејски закани.
Целта е, исто така, да се поттикне интероперабилноста на комбинираните средства на сојузниците, се вели во соопштението на јужнокорејската морнарица.
Во него се посочува дека ова е првиот американски носач на авиони што отпатувал во Јужна Кореја од јуни.
Се очекува ваквиот потег да ја налути Северна Кореја, која смета дека привременото распоредување на моќни американски воени средства е голема закана за безбедноста.
На некои од претходните распоредувања на американски носачи на авиони, бомбардери со долг дострел и подморници на нуклеарен погон, Северна Кореја одговори со ракетни тестови.
Од неговата инаугурација на 20 јануари, американскиот претседател Доналд Трамп изјави дека повторно ќе се обиде да воспостави контакт со севернокорејскиот лидер Ким Џонг Ун.
Северна Кореја директно не одговори на најавата на Трамп.
Северна Кореја во петокот соопшти дека претходно во текот на минатата недела тестирала стратешки крстосувачки ракети за да ги информира своите противници за способноста за контранапад на нејзината војска и подготвеноста за нејзините нуклеарни операции.
По набљудувањето на лансирањето, што беше четврт ракетен тест оваа година, Ким Џонг Ун рече дека војската мора да биде целосно подготвена да го користи своето нуклеарно оружје.
Ким и Трамп се сретнаа три пати од 2018 до 2019 година за време на првиот мандат на американскиот претседател за да разговараат за иднината на нуклеарната програма на Северна Кореја. Разговорите пропаднаа поради спорот околу економските санкции на САД кон Северна Кореја, пренесува АП.