Киргистан и Таџикистан постигнаа договор за завршување на граничниот спор

Претседателите на Киргистан и Таџикистан, Садир Јапаров и Емомали Рахмон денеска (13 март) потпишаа договор за демаркација, со кој се бара да се стави крај на долготрајниот пограничен конфликт во кој имаше десетици мртви од двете страни во последните години.

Договорот, кој беше потпишан во главниот град на Киргистан, Бишкек, предвидува повторно отворање на патниот, железничкиот и воздушниот сообраќај, кои се суспендирани од септември 2022 година.

Киргистан и Таџикистан повеќе пати се судрија околу границата во близина на киргистанскиот град Баткен во 2021 и 2022 година, што кулминираше со шестдневен конфликт во септември 2022 година.

Споровите за 970-километарската граница меѓу двете земји датираат уште од советско време, кога Москва првпат ги исцрта границите во етнички мешаните делови на Централна Азија.