Ирански студенти се судрија со безбедносните сили во Техеран

Ирански студенти кои скандираа антивладини слогани се соочија со безбедносните сили пред универзитет во Техеран, според видеа на социјалните мрежи и други извештаи.

Протестот избувна на 21 февруари пред Универзитетот Шариф, додека студентите се соочија со војници од Басиџ, волонтерска паравоена сила која одигра значајна улога во задушувањето на минатите политички протести.

Студентите можеа да се слушнат како скандираат „Срам, срам“, според видео објавено од студентската новинска агенција Хабар-е Данешџу и на други места. Други можеа да се видат како го мавтаат иранското национално знаме.

Сличен митинг беше пријавен и на Технолошкиот универзитет Амир Кабир.

Фарс, полуофицијална новинска агенција блиска до Корпусот на Исламската револуционерна гарда на Иран, објави дека „сличен собир се одржа на Универзитетот во Техеран со голем број присутни студенти“.

Демострациите се совпаднаа со стотици церемонии што се одржаа низ целата земја оваа недела во чест на жртвите убиени за време на големите судири со безбедносните сили во јануари.

Според групите за човекови права, најмалку 7.000 луѓе беа убиени за време на националните протести што избувнаа кон крајот на декември 2025 година, иако се верува дека вистинскиот број на жртви е значително поголем.

Повеќето од убиствата, според извештаите, се случиле од 8 до 10 јануари, врвот на репресијата.

Протестите, кои оттогаш стивнаа, беа меѓу најголемите во Иран од Исламската револуција во 1979 година.

Историски гледано, комеморативните церемонии честопати добивале политичко значење за време на немири во Иран.

Протестите привлекоа глобално внимание и осуда на бруталното репресирање од страна на владините сили.

Амнести интернешнл соопшти дека најмалку 30 Иранци се соочуваат со смртна казна во врска со протестите.

Американскиот претседател Доналд Трамп го предупреди Техеран против понатамошно насилство врз демонстрантите и се закани со воени акции против режимот.

Трамп испрати две ударни групи на носачи на авиони, со десетици борбени авиони и бомбардери во регионот, а други воени авиони и сили за поддршка беа забележани како летаат кон воздухопловните бази на Блискиот Исток.

Администрацијата на Трамп, исто така, врши притисок врз Иран да се согласи да ги ограничи своите нуклеарни програми за кои инсистира дека се наменети за мирни, цивилни цели, како што е производство на електрична енергија. Вашингтон, заедно со Израел, го обвини Техеран дека има намера да изгради атомско оружје.

Во говорот што го емитуваше во живо државната телевизија, иранскиот претседател Масуд Пезешкијан рече дека неговата земја нема да попушти под притисокот од светските сили.

„Светските сили се редат за да нè принудат да ги наведнеме главите... но ние нема да ги наведнеме главите и покрај сите проблеми што ни ги создаваат“, рече Пезешкијан.

Силите на САД и Израел бомбардираа неколку ирански објекти за кои се верува дека содржат клучни компоненти од нуклеарната инфраструктура на Техеран. Но, не беше јасно колку бомбардирањето ги попречи неговите програми.

Трамп рече дека размислува за ограничен воен удар.

„Претпоставувам дека можам да кажам дека го разгледувам тоа“, рече тој за време на собирот во Белата куќа на 20 февруари.

Србија и Шведска станаа последните земји што ги повикаа своите граѓани да го напуштат Иран поради масовното засилување на САД.