Shugaba Buhari ya ba yan sanda wannan umurnin

Shugaban Najeriya Muhammadu Buhari ya bada umurnin gudanar da bincike kan zargin Jami’an tsaro na lalata da mata da yara a sansanin ‘yan gudun hijirar da rikicin Boko Haram haram ya raba da gidajensu a Jihar Borno.

Rahoton da Kungiyar kare Hakkin Bil Adama ta Human Rights Watch ta fitar ya zargi ‘Yan Sanda da sojojin kasar da yin lalata da Mata a sansanonin ‘Yan gudun hijirar Boko Haram a Maiduguri.

Kungiyar ta ce tana da rahotanni 43 daga mata da ‘yan matan da aka yi lalata da su da wadanda aka yi wa fyade.

Malam Garba Shehu, da ke Magana da yawun Buhari, ya ce shugaban na sane da abin da ke kunshe a cikin rahoton Human Rights Watch kuma ya ba hukumar ‘Yan sanda umurnin gudanar da bincike a sansanonin ‘Yan gudun hijirar.

A wani labari makamancin wannan kuma Kimanin ‘Yan Boko Haram 240 suka mika wuya ga sojojin Nijeriya bayan sun sha luguden wuta ta kasa da sama daga rundunar hadin guiwa ta MNJTF a wani farmakin da ta kaddamar mai taken Gama Aiki.

Jami’in hulda da jama’a na rundunar hadin guiwar Muhammad Dole ya fadi a cikin wata sanarwa cewa ‘Yan ta’addar na Boko Haram da iyalansu sun mika wuya tare da makamansu bayan sun sha wahala a farmakin da aka kaddamar akansu.

Kanal Dole ya ce mayakan sun mika wuya ne a garin Bagasola a cikin Chadi.

Babban kwamandan rundunar hadin guiwar ta MNJTF Janar Lamidi Adeoson da ya ziyarci sansanin da aka ajiye ‘Yan Boko Haram da suka mika wuya a Bagasole, ya yaba akan karfin halin da suka yi na yanke shawarar yin watsi da ta’addanci.

Janar Adeosun ya kuma bukaci su ja hankalin sauran ‘yan uwansu da ke daji su daina fada domin kofa a bude take su mika wuya.

https://youtu.be/nT0m4FpgP-w

The post Shugaba Buhari ya ba yan sanda wannan umurnin appeared first on Nigeria News today & Breaking news | Read Naij.com 24/7.