چارواکي: په جوزجان کې د داعش ډلې ۳۵ غړي وژل شوي

د شاهين قول اردو چارواکي وايي، په جوزجان ولايت کې د داعش ډلې پر پټنځايونو په هوايي حملو کې د دې ډلې ٣٥ غړي وژل شوي دي.


د دې قول اردو وياند نصرت الله جمشيدي نن شنبه ازادي راډيو ته وويل، دغه عمليات تېره شپه د جوزجان ولايت په قوش تپه او درزاب ولسواليو کې د داعش ډلې پر مرکزونو شوي چې په نتيجه کې يې د داعش ډلې ١٣ جنګيالي ټپيان شوي هم دي.


ښاغلي جمشيدي وويل، دغه عمليات به تر هغو روان وي چې په جوزجان او سرپل ولايتونو کې د داعش ډلې ټول مرکزونه له منځه نه وي تللي.