د فجر په نړیوالو تکواندو سیالیو کې افغانستان درېیم مقام وګاټه
د افغانستان د تکواندو د ملي لوبډلې روزونکي بشیر ترکي نن دوشنبه ازادي راډيو ته وویل، د نجونو او هلکانو په دواړو لوبډولو کې افغان لوري درېیم مقامونه ګټلي دي.
ښاغلی ترکی وايي، د نجونو په سیالیو کې لومړی مقام ایران دوهم ازربایجان، درېیم افغانستان او څلورم روسيې وګاټه، په داسې حال کې چې د هلکانو په منځ کې هم لومړی مقام ایران، خو دوهم عراق، درېیم افغانستان او څلورم ارمنستان وګاټه.
په دغو سیالیو کې د نجونو او هلکانو ۱۶ کسیز افغان تکواندوکارانو برخه اخیستې وه.
د فجر جام د ۲۹ مې دورې سیالۍ تېره اوونۍ د ۱۲ هېوادونو په ګډون د ایران په تهران کې پیل شوي وې چې پرون یکشنبه ناوخته پای ته ورسېدې.