چارواکي: د فراه د یو شمېر سیمو په پوځي عملیاتو کې۵۱ طالبان وژل شوي

د فراه امنیتي چارواکي وايي چې د دې ولایت په یوشمېر سیمو کې پوځي عملیات د لسګونه وسله والو په مرګ ژوبله پای ته ورسېدل.


په فراه کې د ملي اردو د ۲ پلې لوا قوماندان ګدا محمد دوست نن یکشنبه خبریالانو ته وویل چې په دې عملیاتو کې د خاک سفېد، بکوا او بالابلوک ولسوالیو ځینې سیمې هم له وسله والو مخالفینو څخه پاکې شوې دي.


دی وایي:


"په دې عملیاتو کې چې د غوڅ ملاتړ د ماموریت هوايي ځواک له موږ سره مرسته کوله، د مخالفینو ۵۱ وسله وال ووژل شول او ۳۲ کسان یې اسیران شول."


وسله والو طالبانو تراوسه د خپلو تلفاتو په اړه څه نه دي ویلي.


چارواکي وايي چې د وسله والو مخالفینو پرضد دا عملیات نېږدې یوه میاشت مخکې پیل شوي وو.