کابل : پاکستان باید د شعار پرځای پرخپلو ژمنو عمل وکړي
د پاکستان د بهرنیو چارو نوي وزیرشاه محمود قریشي پرون وویل چې افغانستان او پاکستان خپلې ستونزې د ګډتفاهم او خبرو له لارې هوارولی شي اوپه همدې نیت په نژدې راتلونکې کې کابل ته ځي.
د افغانستان د بهرنیو چارو مرستیال ویاند صبغت الله احمدي تیره ورځ ناوخته ازادي راډیوته د ښاغلي قریشي د وروستیو څرګندونو په اړه وویل:
"موږ هیله من یو چې پاکستان لکه د افغانستان په څیرپه خپلو ژمنو عمل وکړي. افغانستان د پاکستان، سیمې او د نړۍ په وړاندې په خپلو ټولو تعهداتو عمل کړی. موږ هیله من یو چې نور خبره له شعاره ووځي او د پاکستان نوی حکومت د خپلو ژمنو عملي کول ثابت کړي او موږ د د دواړو ګاونډیو هیوادونو ترمنځ د اړیکو د پیاوړتیا او پراختیا شاهد واوسو."
د پاکستان د بهرنیو چارو وزیرښاغلي قریشي ویلي چې افغانستان ته د میني، دوستي او د یوه نوي پړاو د پیلیدو له پیغام سره ځي.
د پاکستان نوي صدراعظم عمران خان هم ویلي چې له ګاونډیوهیوادونو په تیره بیا له افغانستان سره به د اړیکو د ښه کیدو لپاره ډیرې هڅې وکړي.