د جرمني د فولکس واګن کمپنۍ په ایران کې خپل فعالیت ځنډوي
رېچرد ګرېنل پرون، چهارشنبه د سپټمبر ۱۹مه بلومبرګ نیوز ته وویل:
"موږ له دې پرېکړې خوشحال یو ځکه ایران خپلې اقتصادي منابع په ټوله نړۍ کې د تشدد او بېثباتۍ د زیاتولو لپاره لګوي او له خپلو خلکو یې سپموي."
په جرمني کې د امریکا سفیر بلومبرګ ته وویل چې امریکایي چارواکو او د فولکس واګن کمپنۍ تر تقریباً دوو اوونیو مذاکرو وروسته، د تېرې سې شنبې په ورځ دا موافقه وکړه.
د فولکس واګن یوه ویاند نن د فرانسې خبري اژانس ته وویل چې د صادراتو د اصولو او د نړیوالو او ملي قوانینو عملي کولو ته پر خپل تعهد ولاړ او د امریکا د بندیزونو محدودیتونو ته متوجې دي.
د جرمني موټرو دې پېژندل شوې کمپنۍ تر ۱۷ کلن ځنډ وروسته، تېر کال په ایران کې د موټرو په خرڅولو پیل وکړ.
سپینې ماڼۍ لا په دې اړه تبصره نهده کړې.