چارواکي: د کونړ په شلتن کې د القاعده او طالبان ۲۰ غړي وژل شوي
د کنړ د والي ویاند عبدالغني مصمم د جمعې په ورځ ازادې راډیو ته وویل چې تېره شپه د ملي امنیت ځانګړو ځواکونو د شلتن ولسوالۍ په سونو سیمه کې عملیات کړي چې پکې د القاعده شبکې او وسله والو طالبانو ۲۰ وسله وال وژل شوي دي.
هغه وایي، په وژل شويو کسانو کې ۵ بهرنیان او د طالبانو مهم کسان شامل دي.
مصمم وایي، په دغو عملیاتو کې ولسي وګړو ته هم مرګ ژوبله اوښتې، خو کره شمېر یی نه دی معلوم.
خو د کنړ د عامې روغتیا رئیس عزیزالرحمن ساپی وایي چې دوی ته د عملیاتو له سیمې ۱۵ تنه ټپیان وروړل شوي چې ډېری یې ښځې او کوچنيان دي.
تر اوسه وسله والو طالبانو د تیرې شپې د عملیاتو په اړه څه نه دي ویلي.