د سولې ولسي حرکت نن په هلمند کې لاريون کوي
دغه حرکت پرون په ننګرهار، تر هغه مخکې په خوست او غزني کې دې ته ورته لاريونونه کړي دي.
د سولې ولسي حرکت وياند بسم الله وطندوست پرون ناوخته ازادي راډيو ته وويل:
"د يکشنبې په ورځ په هلمند کې لاريون لرو، د لاريون پر مهال د جګړې پر ښکېلو اړخونو غږ کوو چې نور بايد ژر تر ژره اوربند اعلان شي، يوې سولې او روغې جوړې ته ورسېږو."
د سولې ولسي حرکت په لاريونو کې د حکومت له خوا د خالد پوځي عمليات او د طالبانو له خوا د الفتح په نوم پسرلني عمليات غندل شوي دي.
وسله والو طالبانو د الفتح په نوم د خپلو پسرلنيو عملياتو د پيل اعلان کړى دى.
د سولې ولسي حرکت وايي، په نورو ولايتونو کې به هم د سولې او اوربند په ملاتړ لاريون وکړي.