په سریلانکا کې نن په ګڼو چاودنو کې لږترلږه ١٠٠ تنه وژل شوي
دا چاودنې د کلیساوو په شمول چې د مسیحیانو اختر پکې لمانځل کېده، په بېلابېلو ځایونو کې شوي دي.
درې چاودنې د پلازمېنې کولمبو د شمال د نیګومبو ښارګي په درېيو کلیساوو کې شوي دي، بله چاودنه د کولمبو د ختیځ په ۲۵۰ کیلومترۍ کې په باتیکالوا کې شوې ده.
پوليس وايي، درې نورې چاودنې په پنځه ستوريزو هوټلونو کې شوي دي.
د سريلانکا د ماليې وزير منګالا سمارا ويرا په ټوېټر ليکلي:
"داسې ښکاري چې دا حملې د وژنو، ټپي کولو او انارشۍ لپاره تنظيم شوې وې او ګڼ بې ګناه انسانان يې ووژل."
تر اوسه پورې هېڅ چا د دې حملو مسؤلیت په غاړه نه دی اخیستی.