افغان ولسمشر د پاکستان له صدراعظم سره ټیلیفوني خبرې وکړې
د جمهوري رياست وياند هارون خچانسوري نن رسنيو ته په يوه ويډيويي پيغام کې وويل، دغه ټيليفوني مکالمه نن شوې ده.
ده زیاته کړه:
"عمران خان د افغانستان د سولې له پروسې بشپړ ملاتړ اعلان کړ او د افغانستان د ولسمشر د اقتصاد محوره او منطقوي اتصال د برنامو هرکلى یې وکړ او ويې ويل چې د پاکستان حکومت همنظره برنامې لري."
ښاغلى خچانسوري وايي، عمران خان په دې مکالمه کې ولسمشر غني ته بلنه ورکړه چې پاکستان ته سفر وکړي.
د دې سفر د نېټې په اړه څه نه دي ويل شوي.
جمهوري رياست وايي، ولسمشر غني د دې سفر بلنه منلې او د دواړو هېوادونو ډيپلوماتيک مراجع به د دې سفر نېټه وټاکي.