جنرال حبیب احمدزی لویه څارنوالۍ ته حاضر کړای شو

د افغانستان لویه څارنوالۍ نن د پنجشنبې په ورځ د جمهوري ریاست د ځانګړي امنیت له پخواني مشر جنرال حبیب احمدزي څخه د هغه تورونو په اړه پوښتنې وکړې چې نوموړي په‌دې وروستیو کې پر ارګ ماڼۍ لګولي دي.


د لویې څارنوالۍ ویاند جمشید رسولي نن رسنیو ته وویل چې جنرال احمدزی حاضر شو او څارنوالانو ترې د هغه د ادعاوو او تورونو د سپیناوي لپاره اسناد او شواهد وغوښتل.


د ښاغلي رسولي په وینا جنرال احمدزي د خپلو تورونو د اثبات لپاره کوم ثبوت او سند وړاندې نه‌کړ، خو ویې ویل چې دی به تر راتلونکي اوونۍ اسناد او شواهد وړاندې کړي.


جنرال احمدزي په‌دې وروستیو کې تور پورې کړی و چې په ارګ کې جنسي او مالي فساد موجود دی، خو د افغانستان جمهوري ریاست د ښاغلي احمدزي تورونه بې اساسه بللې دي.