د خوست چارواکو د اختر درېیمه ورځ له یتیمانو سره ولمانځله
په خوست کې د ازادي راډیو خبریال وايي، د دې ماشومانو شمېر سلو ته رسېده چې د چارواکو په وینا، د هغو څو محدودو کورنیو غړي دي چې پلرونه یې د افغان ځواکونو په لیکو کې د خدمت پر مهال وژل شوي.
د خوست والي حلیم فدايي دا ماشومان د هغو کسانو لپاره چې په افغانستان کې د جګړې پر دوام ټینګار کوي، یو پیغام وباله او ټینګار یې وکړ چې د جګړې دوام د داسې یتیمانو شمېر هر ورځ ډېروي.
په سیمه کې زموږ خبریال وايي، په خوست کې د ډېرو لپاره دا لومړی ځل و چې د امنیتي ځواکونو د یو شمېر وژل شویو سرتېرو په دې شمېر یتیم شوي ماشومان یې یو ځای راټول شوي ولیدل.