پوتین: روسیه د ابخازیا له حکومت نه خپل ملاتړ ته دوام ورکوي

د روسیې ولسمشر ژمنه کړې چې د ګرجستان د بېلې شوې سیمې ابخازیا د بېلتون‌پالي حکومت ملاتړ ته به دوام ورکوي.


د کرملېن د رسنیو دفتر ویلي چې ولسمشر ولادیمیر پوتین د سپټمبر په ۳۰مه د ابخازیا مشر «Raul Khajimba» ته د ټلګرام په استولو دا ډاډ ورکړی دی.


کرملېن د ښاغلي پوتین له قوله زیاتوي چې روسیه به له ابخازیا سره مرستې ته دوام ورکړي څو خپل ملي امنیت خوندي او هم په ټولنیزو او اقتصادي پرمختیاوو کې ستونزې هوارې کړي.


ابخازیا د روسیې په ملاتړ په ۱۹۹۰ کلونو کې له ګرجستان څخه د خپلواکۍ اخیستلو اعلان وکړ.


په ۲۰۰۸ کال کې د روسیې او ګرجستان ترمنځ د ۵ ورځنۍ جګړې وروسته مسکو د ابخازیا خپلواکي په رسمیت وپېژندله.