سرپل کې پولیسو یو طالب وژلی چې غوښتل یې د رأی ورکوونکو ګوتې پرې کړي
د سرپل د پولیسو ویاند نورآقا فیضي د دوشنبې (میزان ۱۵مه) په ورځ ازادي راډیو ته وویل، قاري ناصر په ټاکنو کې د ګډون کوونکو کسانو پېژندلو لپاره د سانچارک ولسوالۍ په توپخانې سیمه کې پوسته جوړه کړې وه.
ښاغلي فیضي وویل، دغه طالب سرګروپ غوښتل له خلکو پیسې واخلي او د هغو کسانو ګوتې پرې کړي چې په ټاکنو کې یې رأیه ورکړې ده.
د پولیسو ویاند وویل چې د دولتي ځواکونو په عملیاتو کې قاري ناصر ووژل شو او دوه نور ملګري یې ټپيان شول.
طالبانو تر اوسه په دې اړه څه نه دي ویلي.
د سرپل د مرکز او سانچارک ولسوالۍ ترمنځ لاره له تېرو شپږو میاشتو راهیسي ناامنه ده او داسې راپورونه هم خپاره شوي چې کله ناکله د طالبانو غړي د لارې په اوږدو کې له خلکو باج اخلي.