په کاپيسا کې د طالبانو یو پېژندل شوی مشر قاري ربیع الله وژل شوی
د کاپیسا د امنیې قوماندانۍ ویاند عبدالشایق شورش پرون د اکټوبر په دولسمه د ازادي راډیو خبریال ته وویل چې د اله سای په ولسوالۍ کې څلور نور وسله وال هم له قاري ربیع الله سره یو ځای وژل شوي دي.
شورش څرګنده کړه چې دا وسله وال د شنبې په شپه د کومانډو ځواکونو په عملیاتو کې وژل شوي دي.
هغه همدا راز ویلي چې کومانډو ځواکونو په اله سای کې دوه وسله وال طالبان ژوندي نیولي دي.
وسله والو طالبانو په دې اړه څه نه دي ویلي.
اله سای د کاپيسا له ناکرارو ولسوالیو ګڼل کېږي.