فرانسه د سوریې شمال کې د اوربند غځېدل غواړي

د فرانسې ولسمشر خپل روسي سیال ته ویلي چې پاریس د سوریې په شمال ختیځ کې د اوربند د تمدید غوښتونکی دی.


د فرانسې ولسمشرۍ ماڼۍ ویلي، ایمانویل مکرون د اکتوبر پر ۲۱مه له ولادیمیر پوتین سره ټېلفوني خبرې وکړي او له ډیپلوماتیکو لارو یې د سوریې په شمال کې د اوربند د غځیدو او د کړکیچ د ختمیدو پر اهمیت ټینګار وکړ.


د ترکیې د موافقې له مخې نن ماښام په سوریه کې د کرد ځواکونو پروړاندي د ترکیې د عملیاتو توقف یا د اوربند وخت پای ته رسیږي.


ترکیې خبرداری ورکړی چې د اکتوبر د ۲۲مې تر ضرب الاجل وروسته به، پر هر هغو کرد جنګیالیو برید وکړي چې په خوندي زون کې پاته شوي وي. 


تمه ده د روسیې او ترکیې ولسمشران ولادیمیر پوتین او رجب طیب اردوغان نن سه شنبه د روسیې په سوچي ښار کې سره وګوري.