ولسمشر غني: په پاکستان کې د طالبانو د رهبرانو فعالیت د تاسف وړ دی
د ارګ د خبرپاڼې په حواله، ولسمشر محمد اشرف غني دا خبره پرون د اکټوبر په ۲۵مه د اذربایجان په پلازمېنه باکو کې د پاکستان ولسمشر عارف علوي ته کړې ده.
دواړه ولسمشران د غیر منسلکو هېوادونو د مشرانو په غونډه کې د ګډون لپاره اذربایجان ته تللي دي.
ولسمشر غني د پاکستان جمهور رئیس ته ویلي چې د افغانستان امنیتي او دفاعي ځواکونو د ډیورند په اوږدو کې وسله وال طالبان، د داعش ډله او نورې ترورېستي ډلګۍ ځپلي دي او له هغه یې غوښتنه کړې چې پاکستان دې هم ورته کار وکړي.
د ارګ په وینا، د پاکستان ولسمشر د افغانستان امنیت د خپل هېواد لپاره مهم بللی دی.