د پاکستان د بشري حقونو کمېسیون د بشري حقونو د یوه فعال پر برخلیک اندېښنه ښوولې

په پاکستان کې د بشري حقونو کمېسیون د بشري حقونو د فعال ادریس خټک د برخلیک په اړه اندېښنه څرګنده کړې ده.


د ادریس خټک کورنۍ ویلي چې د هغه په اړه هېڅ معلومات نه لري. 


نوموړی تېره اونۍ صوابۍ ته په لاره کې له خپل موټرچلوونکي سره یوځاي بې درکه شو.


د پاکستان د بشري حقونو کمېسون پرون، د نومبر په ۲۰مه وویل، دا ښايي په پاکستان کې د روانو جبري بې درکیو یوه بله پېښه وي.


ادریس خټک د نوښار (نوشهره) اوسېدونکی دی او په پاکستان کې یې د بشري حقونو د څارنې نړیوالې ادارې او د عفوې نړیوال سازمان ته کار کړی و.


د پاکستان حکومت تر اوسه پر دې پېښه هېڅ خبره نه ده کړې.