چارواکو جوزجان کې د ۱۷ طالبانو د وژلو ادعا کړې
د جوزجان د والي ویاند عبدالمعروف ازر نن ازادي راډیو ته وویل، دا هوايي برید نن د حانقا ولسوالۍ په شاه مرزا سیمه کې پر هغه ځای شوی چې وسله والو طالبانو په کې د شبرغان مزارشریف پر لویه لاره ګمرک جوړ کړی او له باروړونکیو موټرو پیسې اخلي.
هغه زیاتوي: "د خانقا ولسوالۍ په شاه مرزا کلي کې په دې هوايي برید کې 17 وسلوال طالبان وژل شوي نهه تنه نور ټپیان دي. په وژل شویو کې د سرکاتب په نوم ددې ډلې یو سروګروپ او د سرې قطعې درې تنه چې له هلمند ورغلي وو شامل دي."
وړمه ورځ هم د جوزجان امنیتې چارواګو په دې ځای کې د یو هوايي برید او څو تنو وسله والو د وژل کېدو خبر ورکړی و.
طالبانو ددې ادعا په اړه تبصره نه ده کړې.