د افغانستان دفاع وزارت: هلمند کې د طالبانو د حملو پلانونه شنډ شول

د افغانستان دفاع وزارت وایي، د هلمند ولایت په څو ولسوالیو کې یې د طالبانو د حملو پلانونه شنډ کړي دي. 


دې وزارت نن په یوه خبرپاڼه کې وویل، افغان امنیتي او دفاعي ځواکونو د هوایي ځواک په ملتیا تېره ورځ په ناوې، ګرشک او نادعلي ولسوالیو کې پر هغو طالبانو چې په سیمو کې یې د افغان ځواکونو پر امنیتي پوستو د حملو نیت درلود، برید وکړ چې په نتیجه کې یې ۱۵ طالبان ووژل شول او ۴ نور ټپیان شول. 


د خبرپاڼې له مخې په دغو بریدونو کې د طالبانو یو شمېر وسلې او مهمات او نقلیه وسیلې هم له‌منځه وړل شوې دي. 


طالبانو تر اوسه د دفاع وزارت د دغې ادعا په اړه څه نه‌دي ویلي.