چارواکي: په غَلو دانو بار لومړۍ اوکرايني کښتۍ له اديسې بندر څخه حرکت وکړ

اوکرایني او ترکي چارواکي وايي چې د اوکراین په غلې بار لومړنی کښتۍ نن له ادیسې بندر څخه حرکت وکړ.


د اوکراین میلیونونه ټنه غلې ته د هغه تړون په اساس د صدور اجازه ورکول کېږي چې په تېره جولای میاشت د ترکیې او ملګرو ملتونو په منځګړيتوب په استانبول کې لاسلیک شو.


اوکراین او ترکیې اعلان وکړ چې د اوکراین په غلو- دانو بار لومړنۍ کښتۍ نن سهار له ادیسې بندر څخه د لبنان پر لور حرکت وکړ.


د اوکراین د تاسیساتو وزیر ویلي، د رازوني Razoni په نوم دا کښتۍ کې چې د سیرالیون بیرغ پرې رپېده نن سهار له ادیسې بندر څخه وخوځېده.


اولکساندر کوبراکوف پر ټویټر په یو بیان کې لیکلي دي چې پر اوکراین د روسیې له یرغل وروسته د لومړي ځل لپاره د اوکراین له یوه بندر څخه په غلې بار کښتۍ حرکت وکړ.


د ترکیې دفاع وزارت په یو بیان کې ویلي تمه ده چې دا کښتۍ به سبا سه شنبې استانبول ته ورسېږي او له تفتیش وروسته به د لبنان پر لور حرکت ته دوام ورکړي.




روسیې او اوکراین هر یوه له ترکیې او ملګرو ملتونو سره جلا تړونونه لاسلیک کړل چې له مخې یې اوکراین ته، چې د نړۍ د غلې د لویو صادروونکو هېوادونو له ډلې دی، د ۲۲ میلیون ټنه غلې او نورو کرنیزو محصولاتو د صدور خوندي اجازه ورکوي.


دا محصولات پر اوکراین د روسیې د یرغل له کبله د اوکراین د تور سمندرګي په بندرونو کې بند پاتې وو.


په استانبول کې د شوې موافقې له مخې روسیه هم کولای شي خپله کیمیاوي سره او غله بهر ته صادره کړي.


روسیه او اوکراین دواړه د نړۍ د اړتیا وړ غنمو نژدې دریمه برخه تولیدوي، خو پر روسیې د لویدیځ د بندیزونو او د اوکراین د ختیځ په ساحلي ښارونو کې د جګړو له کبله د دواړو هېوادونو صادرات بند شوي وو، مګر په جولای میاشت کې مسکو، کییف، انقرې او ملګرو ملتونو د دواړو هېوادونو د غلې او سرې صادراتو ته د جواز ورکولو تړون لاسلیک کړ.


د اوکراین په غلو، دانو بار دا کښتۍ داسې مهال حرکت کوي چې د اوکراین په جنوب کې پر بندري ښار میکولایف د روسیې د پوځ راکټي حملو پرون هم دوام درلود.


د میکولایف والي ویتالي کيم پرون اعلان وکړ چې په یوه راکټي برید کې د اوکراین د غلې نامتو سوداګر ۷۴ کلن اولیکسي واداتورسکي او د هغه مېرمن هغه مهال ووژل شول چې یو توغندی یې پر کور ولګېد.