ملا هبت الله: د ټولو وزارتونو لوايح او قوانين که د شريعت خلاف وو لغوه کووم يې

د طالبانو مشر ملا هبت الله اخوندزاده په یوه صوتي پیغام کې ویلي چې، د ټولو وزارتونو قوانین او مقررې یې ورغوښتي چې دیني علما یې وڅېړي او هغه حکمونه او قوانین چې غیر اسلامي دي لغوه کړي.

د طالبانو مشر، چې څېره یې له خلکو پټه ساتل کېږي، په دې پیغام کې وايي، ککه اراده لري چې سل په سلو کې اسلامي نظام جوړ کړي او په دې برخه کې یې کار پیل کړی دی.

نوموړي ويلي: "تاسو ته ډاډ درکوم، د ټولو وزارتونو قوانین، اصول او لوایح چې په تېرو شلو کلونو کې د کرزي او اشرف غني په دوره کې جوړ شوي دي، ما راغوښتي دي هغه مې علماوو ته ایښي دي چې له نظره یې تېر کړي، هغه چې شرعي نه‌وي، د خلکو په ګټه نه‌وي او ظالمانه حکمونه وي، هغه لغوه کوو. سوچه اسلامي نظام جوړوو."

د طالبانو مشر هیله څرګنده کړه چې په راتلونکي کې به سل په سلو کې اسلامي نظام جوړ کړي.

د طالبانو د مشر له څرګندونو داسې ښکاري چې خپل اوسنی حکومت هم پوره اسلامي نظام نه ګڼي.

حال دا چې د شریعت په نوم د طالبانو له لوري ځینې سخت قوانین له سختو انتقادونو سره مخامخ شوي دي.

ده په عین حال کې وویل چې د شریعت په چوکاټ کې او د خلکو د ګټو لپاره به طالبان هڅه وکړي چې له نړۍ سره په تعامل کې وي.

له دې جلا د طالبانو د حکومت رئیس الوزرا ملا محمد حسن اخوند «افغانستان او سیمه ییز اتصال، فرصتونه او ننګونې» په نوم کنفرانس ته په پیغام کې ویلي چې دنیاوالو ته وايي چې افغانستان ته د خطر په سترګه نه بلکې د فرصت په سترګه وګوري.

نوموړي ويلي، د افغانستان له ستراتېژیک موقعیت څخه د افغانستان، ګاونډیو او سیمه‌ییزو هیوادونو د هوساینې او سوکالۍ لپاره ګټه واخلي.

خو دا په داسې حال کې ده چې د سیمې او نړۍ هېوادونه لا هم افغانستان خپل امنیت ته ګواښ ګڼي او وايي چې اندېښنه لري چې یو وار بیا به دا هېواد د تروریزم پر مرکز بدل شي.