کندهار کې د فوټسال کپ سیالۍ؛ نورزاد لوبډلې اتلولي وګټله
د ځوانانو راډيو اتم پړاو سيالۍ په کندهار ولایت کې د اتو غوره لوبډلو ترمنځ ترسره شوې، چې د دې ولایت د فوټبال فدراسيون، سپورټ امريت، حکومتي مسوولانو او څه باندې درې زره ننداره کووونکو ګډون کړی وو.
دا لوبې د ځوانانو راډيو له خوا د فوټسال کمېټې او د فوټبال فدراسيون په همکارۍ د سالمې تفریح، يووالي، ورورولۍ او د فوټسال د ودې په موخه د کندهار ولایت د عينو مېنې وطن لوبځای کې ترسره شوې.
دوه غوره لوبډلو نورزاد او ان اف سي په زړه پورې سيالۍ نندارې ته وړاندې کړې او د ځوانانو راډيو د فوټسال کپ د اتم پړاو فاينل ته ووتې.
د نورزاد لوبډلې په وروستۍ سیالۍ کې د ان اف سي لوبډلې ته د پنالټي ضربې په ورکولو سره د ځوانانو راډيو د فوټسال کپ اتلولۍ لقب خپل کړ.
په پای کې د ان اف سي لوبډلې نه همت نورزی د غوره دروازه ساتوونکي په توګه انتخاب شو او د طلا دستکش يې تر لاسه کړ.
د نورزاد لوبډلې نه بيا وکيل رحماني د زياتو ګولونو په وهلو د غوره ګول وهوونکي لقب خپل کړ.
د نورزاد لوبډلې بل لوبغاړي منير حليمي هم د ځوانانو راډيو د فوټسال کپ اتم پړاو سیاليو غوره لوبغاړی اعلان شو او د طلايي توپ جايزه ورکړل شوه.
په جمنازيوم کې د خلکو شور او هيجان ددې لامل شو، چې د افغانستان د فوټسال په تاریخ کې د زياتو ننداره کوونکو سياليو ریکارډ مات کړي او له خلکو څخه د سټډيم د ډکېدو له امله دا سيالۍ د کندهار د فوټسال کميټې له پاڼې نه په ژوندۍ بڼه خپرې او ننداره شوې.
ټاکل شوې ده، چې په مياشت کې دننه د ځوانانو راډيو د فوټسال سوپر کپ سيالۍ له اتو زونونو څخه د اتو قهرمانو لوبډلو ترمنځ ترسره شي.