سرچینې: حامدکرزي ته له افغانستانه بهر د سفر اجازه نه ورکول کېږي
کرزي ته یوې نږدې سرچینې نن ازادي راډیو ته وویل چې طالبانو د جرمني په پلازمېنه برلین کې په یوه نړیواله غونډه کې د ګډون لپاره د کرزي غوښتنې ته ځواب نه دی ویلی.
سرچینې زیاته کړه چې طالبانو پر افغانستان د واکمنۍ له پیله تراوسه روسیې او هند او اوس جرمني ته د سفر لپاره د کرزي غوښتنو ته له ځواب ویلو ډډه کړې.
حامدکرزی، د پخواني دولت د سولې د عالي شورا رییس عبدالله عبدالله او د مشرانو جرګې رییس فضل هادي مسلمیار د پخواني نظام جګپوړي چارواکي دي چې د نړیوالو ځواکونو تروتلو وروسته هم په افغانستان کې پاتې دي، خو عبدالله او مسلمیار مخکې له دې بهر ته سفرونه کړي دي.