کابل کې پر نشه يي توکو د اخته کسانو د درملنې یو مرکز پرانېستل کېږي
د طالبانو د اطلاعاتو او فرهنګ وزرات نشراتي مرستیال مهاجر فراهي پرون په څو ټوېټونو کې ویلي چې د دغه مرکز د جوړېدو کارونه نوي سلنه بشپړ شوي او په یوه میاشت کې دننه به په کې د روږدو کسانو ځای پر ځای کول پیل شي.
د هغه په خبره په دې مرکز کې به د معتادینو لپاره د درملنې ترڅنګ د بېلابېلو مهارتونو د روزنې امکانات برابر شي او هم به ورته دیني او عقیدوي زده کړې ورکړل شي.
د ښاغلي فراهي په خبره د یوې احصایې له مخې په افغانستان کې د معتادینو شمېر شاوخوا درې میلیون کسانو ته رسېږي چې ښځې او ماشومان هم په کې دي.