هندوستان هم د ټېسټ اتلولۍ پایلوبې ته لار پیدا کړه
د لوبلړۍ وروستۍ ټېسټ لوبه د کرکټ په تر ټولو ستر نریندرا مودي لوبغالي کې د مارچ په ۹مه نېټه پیل او نن دوشنبه بې پایلې ته ورسېده.
د دې سیالۍ لومړۍ پاڼۍ اسټرالیا ترسره کړه چې ۴۸۰ منډې یې وکړې.
د دوی په توپ وهونکو کې عثمان خواجه ۱۸۰ او کیمرن ګرین بیا ۱۱۴ منډې کړې وې.
هندۍ لوبډلې ته اشوین ۶ او محمد شامي ۲ لوبغاړي وسوځول.
د هند لوبډلې خپله لومړۍ پاڼۍ تر ۵۷۱ منډو پورې وغځوله او بیا وسوځېدل.
پخواني لوبډلمشر ویرات کولي تر ټولو زیاتې ۱۸۶ او شبمن ګیل بیا ۱۲۳ منډې جوړې کړې.
د اسټرالیا په توپ اچونکو کې ټډ مورپي او نتن لاین د هند ۳ـ۳ لوبغاړي وسوځول.
په دې سیالۍ کې اسټرالیا ته د دویمې توپ وهنې نوبت هم ورغی، خو د ۵مې ورځې تر پایه یې د ۲ لوبغاړو په سوځېدو سره ۱۷۵ منډې وکړې او د لوبې ټاکلی وخت بشپړ شو.
د دې لوبلړۍ لومړنۍ دوه لوبې هند او درېيمه بیا اسټرالیا ګټلې وه، په دې سره هندۍ لوبډله ګټونکې شوه.
په دې سیالۍ کې ویرات کولي د غوره لوبغاړي او اشوین او جدیجا بیا په شریکه د لوبلړۍ د غوره لوبغاړو جایزې وګټلې.
اسټرالیا چې درېیمه ټېسټ سیالۍ وګټله د ټېسټ اتلولۍ پایلوبې ته یې لار پیدا کړه، خو بل لورته د نیوزیلنډ او سریلانکا ترمنځ په لومړنۍ ټېسټ سیالۍ کې د کوربه لوبډلې بریا هند ته هم د پایلوبې لوبولو چانس برابر کړ.
اوسمهال د ټیسټ اتلولۍ د نومرو په جدول کې اسټرالیا لومړۍ او هند دویم مقام لري.
دواړه لوبډله به د روان کال د جون میاشتې په ۷مه نېټه د انګلستان په اوول لوبغالي کې پایلوبه ولوبوي.
د ویلو ده چې هند د دویم ځل لپاره د ټېسټ اتلولۍ پایلوبې ته لار پیدا کوي او د لومړي پړاو اتلولي بیا نیوزیلینډ ګټلې وه.