يونېسف: افغانستان کې د ماينونو د خطر د کمېدو په اړه د پوهاوي هڅې تېزوو
د افغانستان لپاره د یونېسف څانګې پرون یکشنبې په خپله ټویټرپاڼه کې ویلي چې، په ۲۰۲۲ کال له اوه سوه زیات ماشومان له جګړې راپاتې د ناچاودي مهماتو او وسیلو په چاودنه کې مړه یا معلول شوي دي.
د دې صندوق په وینا په متوسط ډول هره ورځ دوه ماشومان د ماینونو او نورو ناچاوده وسیلو قرباني شوي او زیاتوي، دا مهمه ده چې د ماشومانو د ساتنې لپاره په ګډه کار وکړو.
یونېسف ویلي چې، یوازې تېره اوونۍ په افغانستان کې اته ماشومان د ناچاوده مهماتو د چاودنې په پېښو کې مړه شول.
د دې ادارې په وینا دوی هغه مهال خپل ژوند له لاسه ورکړ چې له دغو وسیلو سره يې لوبې کولې، یا یې زړې وسپنې د خرڅلاو لپاره راټولولې.
یوه پېښه د تېرې چهارشنبې په ورځ د بدخشان ولایت د تګاب کشم ولسوالۍ په شهیدګان کلي کې هغه مهال رامنځته شوه چې، څو ماشومانو چې یو لاسي بم یې موندلی او هغه یې له نورې وسپنې سره د پلور لپاره لېږداوه، پرې وچاودېد.
په دې پېښه کې د چارواکو په وینا دوه ماشومان مړه شول او پنځه نور ټپیان دي.
تر دې پېښې درې ورځې وړاندې په غور ولایت کې د لاسي بم چاودنې په ورته پېښه کې پنځه ماشومان او د هغوی مور مړه شوي وو.
د ملګروملتونو د ماشومانو د ملاتړ صندوق وایي، د ماینونو د خطرونو په اړه د پوهاوي هڅې تېزوي ترڅو ماشومانو، د هغوی پالونکو او ټولنې ته په دې برخه کې زده کړې ورکړي.
یونېسف همدارنګه ويلي چې، د هغو کورنیو او ماشومانو به چې ماین چاودنو اغېزمن کړي، رواني ملاتړ وکړي.
د ملګروملتونو د ماشومانو ملاتړې دغې ادارې ویلي چې، موږ باید په ګډه د ماین پاکۍ د هڅو ملاتړ وکړو، د ماینونو د خطرونو له پوهاوي او هم له اغېزمن شویو قربانیانو سره مرسته وکړو.
د راپورونو له مخې پر افغانستان د طالبانو له بیاځلي واکمنېدو راهیسې له دې هېواد سره د نړیوالې ټولنې د مرستو د کمېدو په ترڅ کې، د ماین پاکۍ په برخه کې هم مرستې کمې شوې دي.
په تېرو څه باندې شلو کلونو کې د جګړو د مختلفو لورو لهخوا ډېرې ځمکې پر ماینونو پوښل شوي چې، د کارپوهانو په وینا پاکول یې کلونه کلونه وخت او مالي سرچینو ته اړتیا لري.
د ملګروملتونو د شمېرو له مخې د ۲۰۰۸ کال د ډسمبر له میاشتې راهیسې چې دې ادارې په افغانستان کې د ملکي تلفاتو د ثبت رسمي پروسه پیل کړې، په دې هېواد کې د جګړو له امله لږ تر لږه ۱۱۸ زره او ۴۴۳ ولسي وګړي وژل شوي دي.