ډېری افغان نجونو انلاين زدهکړو ته مخه کړې
رویټرز اژانس په یوه تازه راپور کې د (رومي) په نوم د یوې انلاین اکاډمۍ یادونه کړې چې لومړی یې پنځوس خو اوس پنځه سوه افغان زدهکوونکې لري.
یو شمېر افغان زدهکوونکو له رویټرز سره په خبرو کې د سپیس ایکس له اجرایي مشر ایلن ماسک نه غوښتنه کړې چې د اوکراین او ایران په څېر دوی ته هم د سپوږمکۍ له لارې د انټرنیټ زمینه برابره کړي.
طالبانو تر شپږم ټولګي پورته د نجونو ښونځي له وړاندې بند کړي دي، خو تېره دسمبر میاشت کې یې د دوی پوهنتونونه هم تر دویم اعلان پورې بند کړل.
دوی وایي، له تخنیکي پلوه د نجونو د زدهکړو دوام ته لا زمینه نهده برابره شوې، خو نړیوال بنسټونه او د ښځو فعالانې بیا طالبان تورنوي چې نجونې او ښځې یې له عمومي صحنې ګوښې ته کړي.