د متقي په مشرۍ دوحې ته سفر؛ د طالبانو پلاوی امریکایي استازو سره ویني
ښاغلي متقي د کابل په هوایي ډګر کې وویل، چې له امریکایي لورې سره به د دوی پر حکومت د بندیزونو د لرې کیدو او پر یوشمیر نورو مسایلو په تړاو وغږیږي.
تمه ده، چې د امریکا د متحد ایالتونو او د طالبانو د حکومت پلاوي به سبا د قطر په پلازمینه دوحه کې سره وګوري.
د امریکایي پلاوي مشري د افغانستان لپاره د امریکا ځانګړی استازی ټام ویسټ او د بشري حقونو او افغان ښځو او نجونو په برخه کې د امریکا ځانګړې استازې رینا امیري کوي.
د امریکا د بهرنیو چارو وزارت تیره اونۍ ویلي وو، چې د بحث په اصلي موضوعاتو کې د افغانانو لپاره بشري ملاتړ، اقتصادي ثبات، د ښځو او نجونو په ګډون له ټولو افغانانو سره عادلانه او باعزته چلند، امنیتي مسایل او د نشه یي موادو له تولید او قاچاق سره د مبارزې هڅې شاملې دي.