د امریکا استازو جرګې اوکراین سره د لګښتونو لنډ مهاله لایحه تصویب کړه
له دې سره له اوکراین سره د امریکا د متحدو ایالتونو د نوي ملاتړ مخه ډب کېږي او د امریکا د حکومت ځینې برخې له تړل کېدو ساتل کېږي.
د ډیموکرات او جمهوریپال ګوندونو غړو په ګډه پرون ناوخته د دې لایحې ملاتړ وکړ او تر نیمې شپې مخکې د توشېح لپاره ولسمشر جو بایډن ته ولېږل شوه.
د استازو جرګې دا کار یوازې څو ساعته وړاندې تر دې وکړ، چې ټاکل شوې وه د بودجې نه منظورېدو له کبله د فډرال حکومت ځینې برخې وتړل شي او په میلیونونو مامورین او نظامي پرسونل یا وزګاره شي، یا هم له معاش پرته کار وکړي.
د استازو په جرګه کې د جمهوریپال ګوند د غړو ترمنځ د اوکراین د نور ملاتړ مخالفت په زیاتېدو دی.
د کانګرس مشرانو ژمنه کړې، چې پر دې موضوع به په راروانو اوونیو کې بیا سره جرګه کېږي.
ولسمشر بایډن د اوکراین لپاره د ۲۴ ملیارد ډالرو په ارزښت د نورې مالي مرستې غوښتنه کړې ده.
د امریکا د متحدو ایالتونو د ۲۰۲۲م کال له فبروري میاشتې راهیسې چې روسیې پر اوکراین یرغل پیل کړی، اوکراین ته د ۱۳۳ ملیارد ډالرو په ارزښت تسلیحاتي او بشري مرسته لېږلې ده.