طالب چارواکي: پاکستان تورخم دروازه وتړله

په ننګرهار کې د طالبانو سیمه ییز چارواکي وايي، د تورخم لاره له دواړو لورو د باروړونکو موټرو پرمخ تړل شوې ده.


باختر خبري اژانس چې طالبان یې اداره کوي، د تورخم د کمیسار مولوي عصمت الله یعقوب له قوله خبر ورکړی چې پاکستاني چارواکو دا دروازه نن غرمه هغه مهال په مشروط ډول وتړله چې له موټر چلوونکو څخه یې د ویزې او پاسپورت غوښتنه کوله.


کمیسار زیاتوي چې طالبانو هم متقابل اقدام وکړ او هغو پاکستاني ټرک ډریورانو ته اجازه نه ورکوي چې ویزې او پاسپورتونه نه لري.


د افغانستان او پاکستان ترمنځ د پخوانیو موافقو په اساس پر ډیورنډ کرښه په جوړو دروازو کې، د ټرکونو له ډریورانو څخه د پاسپورټ او ویزې غوښتنه نه کېدله.