Барномаи ниҳоии варзишии Бозиҳои 20-уми тобистонаи осиёӣ тасдиқ шуд
Шӯрои олимпии Осиё барномаи ниҳоии варзишии Бозиҳои 20-уми тобистонаи осиёиро, ки аз 19-уми сентябр то 4-уми октябри соли 2026 дар шаҳрҳои Айчӣ ва Нагояи Ҷопон баргузор мешаванд, тасдиқ кард.
Тавре сомонаи Шӯрои олимпии Осиё хабар медиҳад, ба барномаи Бозиҳои 20-уми тобистонаи осиёӣ 41 намуди варзиш, ки 68 ришта ва 460 мусобиқаро муттаҳид месозад, шомил шудааст.
Варзишгарон барои 217 маҷмӯи ҷоизаҳо дар мусобиқот байни мардон, 204 маҷмуи медалҳо миёни занон ва 39 маҷмӯи ҷоизаҳо дар рақобатҳои омехта мубориза мебаранд.
Дар байни намудҳои варзиш ҳам риштаҳои олимпӣ (варзиши сабук, шиноварӣ, футбол, теннис) ва ҳам риштаҳои анъанавӣ барои минтақа ё риштаҳои нав, аз қабили киберспорт, брейкинг, сепактакрау, ушу ва кабодӣ дохиланд.
Илова бар ин, ба барномаи бозиҳо чунин намудҳои варзиш, аз қабили бокс, ҷудо, регби-7, вазнабардорӣ, панҷҳарбаи муосир, шамшербозӣ, скейтбординг, қаиқронӣ, варзиши бодбонӣ ва ҳунарҳои размӣ (ҷиу-ҷитсу, кураш, ММА) шомил шудаанд.
Ҷопон бори сеюм мизбони Бозиҳои тобистонаи осиёӣ мешавад. Қаблан дар ин кишвар соли 1958 (Токио) ва соли 1994 (Хиросима) мусобиқоти қитъавӣ доир шуда буд.
Бозиҳои тобистонаи осиёӣ аз соли 1951 дар ҳар чаҳор сол таҳти сарпарастии Шӯрои олимпии Осиё баргузор мешаванд.
Дастаи мунтахаби Тоҷикистон аз соли 1994 дар ин бозиҳо ширкат варзида, ҳамагӣ 34 медал гирифтааст, ки 6-тоаш нишони тилло, 7-тоаш нуқра ва 21-тоаш биринҷӣ мебошад.
Се медали тиллоро гурзандоз Дилшод Назаров, дутоашро муштзанҳо Ҷаҳон Қурбонов ва Давлат Болтаев, инчунин як медали тиллоро Сомон Маҳмадбеков дар риштаи ҷудо ба даст овардаанд.
Дастаи мунтахаби Тоҷикистон дар Бозиҳои 19-уми тобистонаи осиёӣ, ки аз 23-юми сентябр то 8-уми октябри соли 2023 дар шаҳри Ҳангжоуи Чин бо ҳузури беш аз 10 000 варзишгар аз 45 кишвар баргузор шуд, дар ҳисоби медалҳо бо дарназардошти сифати онҳо бо касби 7 медал (2 тилло, 1 нуқра ва 4 биринҷӣ) дар ҷойи 24-ум ва аз ҷиҳати теъдоди умумии медалҳо дар ҷойи 25-ум қарор гирифт.
Дар ин бозиҳо 106 варзишгари тоҷик дар 17 ришта ҳунарнамоӣ карда, танҳо дар се намуд – ҷудо (3), бокс (2) ва кураш (2) – медал ба даст оварданд.
Сомон Маҳмадбеков дар риштаи ҷудо дар вазни то 81 кило медали тилло ба даст оварда буд. Темур Раҳимов дар вазни +100 кило медали нуқра гирифт. Беҳрӯзи Хоҷазода дар вазни то 73 кило барандаи медали биринҷӣ шуд.
Хайрандеш Муродзода дар риштаи кураш дар вазни то 66 кило ва Ҳақназар Назаров дар вазни то 90 кило бо медалҳои биринҷӣ сарфароз гаштанд.
Давлат Болтаев дар риштаи бокс дар байни мардон дар вазни то 92 кило соҳиби медали тилло ва Миҷгона Самадова миёни занон дар вазни то 57 кило медали биринҷӣ ба даст оварданд.
Тоҷикистон дар байни кишварҳои Осиёи Марказӣ пас аз Узбекистон (22-18-31), Қазоқистон (10-22-48), Қирғизистон (4-2-9) ва пеш аз Туркманистон (1 нуқра ва 6 биринҷӣ) ҷойгир шуд.
Дар Бозиҳои 19-уми тобистонаи осиёӣ варзишгарон аз рӯи 40 намуд барои 481 маҷмуи медалҳо мубориза бурданд.
Мунтахаби Чин бо 383 медал (201 тилло, 111 нуқра ва 71 биринҷӣ) ҷои аввалро соҳиб шуд. Мунтахаби Ҷопон бо 188 медал (52 тилло, 67 нуқра ва 69 биринҷӣ) ҷойи дувум ва мунтахаби Кореяи Ҷанубӣ бо 190 медал (42 тилло, 59 нуқра ва 89 биринҷӣ) ҷойи севумро гирифтанд.