Aşgabatda täze diş merkezi gurulýar, Lebapda lukmanlar dermanlary we serişdeleri öz hasabyna satyn alýar
Türkmen paýtagtynda gurulýan keselhanalaryň sany artýar. Häzir gurulýan desgalaryň arasynda stomatologiýa merkezi hem bar. Paýtagtda täze saglyk edaralary gurulýarka, welaýatlarda ýerli ýaşaýjylar saglygyny bejermekde dürli kynçylyklary başdan geçirýärler.
Lebapda stomatologiýa hyzmatlaryny hödürleýän esasy saglyk edarasy - 1980-ji ýylda gurlup ulanylmaga berilen Stomatologiýa merkezi.
Azatlygyň ýerli habarçylary bu ýere dişini bejertmek üçin barýan näsaglaryň köp garaşmaly bolýandygyny we töleginiň köpçülige elýeterli däldigini aýdýarlar.
"Bu merkeze baryp diş lukmanyna ýüz tutsaň, adyňy ýazyp bir günden gel diýýär. Ertesi barsaň tölegini hasaplap başlaýar. Bir dişiňe azyndan 300 manat düşýär. 'Razy bolsaň bejerip baslaly' diýär" - diýip, ýerli çeşme gürrüň berýär.
Ýerli lukmanlar bolsa, döwletiň garamagyndaky stomatologiýa merkezinde zerur dermanlaryň we hatda medisina serişdeleriniň hem ýokdugyny aýdýarlar.
"Dowlet tarapyndan hiç derman, plomba üçin serişde, sanjym üçin şpris we başga zatlar berilmeýär. Hatda rezin ellikleri-de öz hasabymyza satyn alýarys" - diýip, Stomatologiýa merkeziniň lukmany habarçymyza gürrüň berdi.
Stomatologyň sözlerine görä, merkeziň işgärleri öz işi üçin ähli zerur zatlary öz hasabyna satyn almaly bolýarlar.
Çeşmeler medisina serişdelerini satýan telekeçileriň lukmanlar üçin zerur zatlary hatda keselhanalara eltip berýändigini gürrüň berýärler. "Men diş doktoryň oturgyjynda otyrkam, bir şirketiň satyjysy gelip, 'Doktor men siziň sargan dermanlaryňyzy alyp geldim, alarsyňyzmy diýip, diş üçin dürli hili plombalary we diş bejergisinde ulanylýan serişdeleriň binäçesini hödürledi. Lukman dermanlary, plombalary we elikleri satyn alyp, ýene-de goşmaça sargady. Soňra satyjy diş merkezindäki hemme otaga girip, diş lukmanlary bilen söwda etdi" diýip, keselhanada dişini bejerden çeşme 4-nji awgustda gürrüň berdi.
Bu ýagdaýda diş bejergisiniň tölegini toläp bilmeýän näsaglar hem öz tarapyndan çykalga gözleýärler. Dişi agyrýan, emma puly bolmadyk hassalar köplenç bejerip boljak dişini-de gopartmakdan başga çäre tapmaýarlar.
Ýagdaýy ýok näsaglar baryp 50 manada dişini gopardýarlar diýip, habarçymyz aýdýar.
"Menim ýagdaýym ýok, bu ýere günde gatnamaga pulum ýok, iň aňsady gopardyp aýyrtjak" - diýip, hirurgyň otagynyň öňünde nobatda oturan bir näsag habarçymyza aýtdy.
Lebap welaýatynda Stomatologiýa merkezinden başga diş bejerýän ýene iki sany kiçiräk saglyk edarasy bar - Çagalar merkezi, şeýle-de ‘Melhem’ atly stomatologiýa merkezi hereket edýär. Olar 1960-1970-nji ýyllarda gurlan binalarda ýerleşýär.
Azatlygyň habarçysy bu keselhanalardaky nobatlaryň hasam uludygyny aýdýar.
Ýurtda hökümet tarapyndan boýun alynmaýan ykdysady problemalar zerarly ilat köpçüliginiň maddy ýagdaýy gitdigiçe agyrlaşýar, şol sanda ilatyň bir bölegine medisina hyzmatlary elýeterli däl.
Soňky döwürde saglygy bejermek bilen bagly hyzmatlar üçin tölemegiň täze usullary döredi. Olaryň biri medisina hyzmatlary üçin gan tabşyrmakdan ybarat. Şu ýylyň bahar aýlarynda Türkmenistandaky hassahanalarda öz näsag ýakynlaryny bejermegiň çykdajylary üçin pul töläp bilmeýänlerden gan tabşyrmak soralyp başlandy.
Türkmenistanyň hökümeti saglygy saklaýyş pudagyndaky problemalary resmi derejede gozgamaýar. Resmi habarlarda ýurtda saglyk merkezleriniň onlarçasynyň gurlandygy, olaryň döwrebap enjamlaşdyrylandygy aýdylýar, emma medisina hyzmatlarynyň hili we ilat köpçüligine elýeterliligi temasy gozgalmaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.