Balkanda bolan üç ýol-ulag hadysasynda dört adam heläk boldy
“29-njy noýabrda Balkanabat şäherinde bir ýeňil ulag ýokary tizlik bilen Tiz kömek ulagyna baryp urdy. Ýeňil ulagyň sürüjisi wakanyň bolan ýerinde heläk boldy. At sport toplumynyň golaýynda bolan wakada ýeňil ulag ot aldy” diýip, ýagdaýlardan habarly ýerli polisiýa bölümindäki çeşmämiz aýtdy.
22-nji noýabrda Türkmenbaşy-Aşgabat magistral ýolunyň Bereket etrap merkezine golaý böleginde hereket edip barýan ýeňil ulagyň öň tekeriniň ýarylmagy netijesinde, ulagyň sürüjisine agyr şikes ýetdi.
“Öýlän sagat 3 töwereginde bolan ulag hadysasynda ýeňil ulag ot aldy. Agyr şikeslenen ulag sürüjisi wakadan bir gün soň hassahanada aradan çykdy” diýip, ýagdaýlardan habarly saglyk işgäri anonimlik şertinde aýtdy.
Noýabryň ortasynda Türkmenbaşy-Bekdaş ýolunyň ugrunda bolan ýene bir ýol-ulag hadysasynda bir ýeňil ulag daşary ýurtdan gelýän ýük ulagyň yzyndan ýokary tizlik bilen baryp urdy.
“Garabogaz şäherçesiniň golaýynda bolan ýol hadysasynda ýeňil ulagyň sürüjisi we onuň gapdalynda oturan ýolagçy wakanyň bolan ýerinde jan berdi” diýip, ýagdaýlardan habarly polisiýa işgäri aýtdy.
Ol bu ýol-ulag hadysalarynyň üçüsinde hem, ýeňil ulaglaryň ot alandygyna ünsi çekip, munuň polisiýa işgärlerini alada goýandygyny hem belledi.
“Soňky birnäçe ýylyň dowamynda ýol-ulag hadysalarynda awtoulaglaryň çaknyşmagy netijesinde, ýeňil ulaglaryň partlap, ot almagy ýaly wakalar köpelýär. Bu wakalar ýol-ulag hadysalarynyň 60%-de ýüze çykýar. Häkimiýetler muňa nämäniň sebäp bolýandygy bilen gyzyklanýarlar” diýip, polisiýa işgäri aýtdy.
Azatlyk bu ýagdaýlar barada Balkanyň Polisiýa müdirliginden teswir alyp bilmedi.
Bu aralykda, Aşgabatdaky habarçymyz 4-nji dekabrda irden sagat 8 töwereginde alty ýeňil ulagyň gatnaşmagynda ýol-ulag hadysasynyň bolandygyny habar berýär.
“Saparmyrat Türkmenbaşy şaýoly bilen Galkynyş köçesiniň çatrygynda bolan ýol hadysasynda adam pidasy bolmady” diýip, waka şaýat bolan aşgabatly ýaşaýjy belledi.
Türkmenistanda ýol-ulag hadysalaryna köplenç çukanakly ýollar, awtoulagyň ýokary tizlikde ýa-da içgili dolandyrylmagy ýaly ýagdaýlar sebäp bolýar.
PÝGG Türkmenistanda bolýan ýol-ulag hadysalary barada hasabat bermeýär. Içeri işler ministrligi hem, ýol heläkçilikleri baradaky statistikany çap etmeýär. Döwlet gözegçiligindäki media serişdeleri hem ýol hadysalaryny agzamaýar.
Ýöne Azatlygyň habarçylary adam pidalaryna getirýän köçe-ýol hadysalary barada yzygiderli habar berýärler. Şu ýylyň on bir aýynyň dowamynda diňe Azatlygyň habar beren aýrybaşga on bir ýol-ulag hadysasynda azyndan 51 adam heläk boldy, başga-da onlarça adam ýaralandy.
Bu aralykda, Türkmenistanda bolýan ýol-ulag hadysalary barada habar bermeýän hökümetçi neşirler daşary döwletlerde bolýan ýol-ulag hadysalary barada wagtal-wagtal maglumat çap edýärler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.