Russiýanyň Aşgabatdaky ilçihanasy wiza bermegini 50% köpeldendigini aýdýar
Russiýanyň Türkmenistandaky ilçisi Iwan Wolynkiniň 18-nji dekabrda metbugat üçin beren maglumatynda aýdylmagyna görä, rus ilçihanasy 1-nji dekabra çenli türkmenistanlylara 109 müňden gowrak wiza berdi, olaryň 30,5 müňi okuw, 58 müňi syýahatçy wizasy.
Şol bir wagtda, 2023-nji ýylyň degişli döwri bilen deňeşdirilende, wiza alanlaryň umumy sanynyň 50% köp bolandygy, syýahat wizalaryny alanlaryň sanynyň bolsa 60% -den gowrak köpelendigi aýdylýar.
Şu günki günde rus ÝOJ-larynda Türkmenistanyň 47 müňden gowrak studenti okaýar. Türkmenleriň iň köp okaýan okuw jaýlary Moskwa, Sankt-Peterburg, Kazan, Astrahan, Wolgograd, Saratow we Don boýundaky Rostow şäherlerinde ýerleşýär.
2022-nji ýyldaky maglumatlar Russiýanyň uniwersitetlerinde şol wagt 30,7 müňden gowrak türkmen raýatynyň bilim alýandygyny görkezipdi.
Rus hökümeti şu ýyl Türkmenistandan gelen okuwçylara býujet hasabyna berilýän kwotany iki esse (500 ýere çenli) artdyrdy.
2024-nji ýylyň ýedi aýynda Russiýa bilen Türkmenistanyň arasyndaky özara söwdanyň mukdary 58% ýokarlandy, demirýol arkaly edilýän eksportyň, importyň we tranzit ýükleriniň mukdary birnäçe esse ýokarlandy diýip, ilçi aýtdy.
Häzir rus maýasynyň gatnaşmagynda Türkmenistanda 190 töweregi ykdysady gurama işleýär diýip, ilçi “Gazprom”, “Kamaz”, “Wozroždeniýe”, “Tatneft”, TMK kompaniýalarynyň wekilhanalaryny we şahamçalaryny mysal getirdi.
Synçylar Türkmenistandaky işsizligiň we bilimdäki korrupsiýanyň barha köp türkmenistanlynyň daşary ýurtlara, şol sanda Russiýa gitmegine sebäp bolýandygyny aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.