Gurbanguly Berdimuhamedow Monako knýazlygyna sapar edýär

Halk maslahatynyň başlygy Gurbanguly Berdimuhamedow iş sapary bilen Monaka knýazlygyna bardy diýip, Türkmenistanyň resmi metbugaty bazar güni habar berdi.


Berdimuhamedow Aşgabatdaky howa menzilinde metbugat wekilleri bilen söhbetdeş bolup, şu ýyl Türkmenistan bilen Monakonyň arasynda diplomatik gatnaşyklaryň ýola goýulmagyna 10 ýyl dolýandygyny, şu sebäpden bu saparyň iki ýurduň arasynda dürli ugurlarda hyzmatdaşlygy ösdürmekde möhüm tapgyr boljakdygyny aýtdy.


Öňki prezidentiň anyklaşdyrman aýtmagyna görä, onuň Monako knýazlygyna edýän sapary özara bähbitli hyzmatdaşlygy ösdürmekde täze sahypany açar.


Türkmenistanyň “Galkynyş” milli at üstündäki oýunlar topary bu saparyň öňüsyrasynda Monte-Karlo şäherinde sirk sungatynyň 47-nji halkara festiwalyna gatnaşdy.


Türkmen atşynaslary özleriniň ahalteke bedewleri bilen ajaýyp çykyşlary görkezdiler diýip, habarda aýdylýar.