Paýtagtda itler we pişikler ýok edilýär
Aşgabat şäheriniň ýaşaýjylary, şol sanda öý haýwanlarynyň eýeleri şäherde öýsüz itleriň we pişikleriň tas galmandygyny belleýärler.
"15-nji ýanwardan bäri zäherli iýmit bilen itleri gyrmak boýunça köpçülikleýin iş geçirilip başlandy. Zäherlenen haýwanlar pes gatly jaýlaryň golaýynda ýaşaýan we ýaşaýjylar tarapyndan ideg edilýän itler we pişiklerdi. Ýaşaýjylar olaryň [ölüm halyny] surata düşürdiler. Çagalar ölýän itleriň ýanynda agladylar" - diýdi Aşgabat şäheriniň ýaşaýjysy öz görenlerini gürrüň berdi.
Paýtagtyň birnäçe ýaşaýjysynyň, şol sanda öý haýwanlarynyň eýeleriniň we köçe süpürijileriň howpsuzlyk sebäpli adynyň agzalmazlygy şertinde Azatlyga beren maglumatlaryna görä, şuňa meňzeş ýagdaý paýtagtyň beýleki böleklerinde, şol sanda 5-nji etrapçada-da gaýtalanypdyr.
Köçe süpürijileriň sözlerine görä, olara zäherli azygy her ýerde zyňyp çykmak ýolbaşçylary tarapyndan tabşyrylypdyr.
Paýtagtda köçelerde itleri we pişikleri köpçülikleýin ýok etmek boýunça çäreleriň janlanmagyna iki aýdan gowrak wagt bolupdyr.
"Şäheriň merkezinde pişikleriň we galan itleriň köpçülikleýin öldürilmegi noýabr aýynda başlandy. '47 66' belgili gyzgylt reňkli awtoulagdaky adamlar jemagat gulluklarynyň eşiginde bolman, eýsem raýat eşikli we elleri demir armaturaly aýlanýarlar. Olar ýaşaýjylaryň haýwanlary iýmitlendirýän ýerlerine göni barýarlar, diýmek ol ýerleri öňünden bilýärler. Olar özlerini saklamaga synanyşan aýal-gyzlara 'haýwanlary öldürmek gadagandyr, biz olary Owadan depedäki penahana ibermek üçin tutýarys' diýip, jogap berdiler" diýip, aşgabatly ýaşaýjy gürrüň berdi.
Adynyň efirde tutulmazlygy şerti bilen gürrüňdeş bolan paýtagt ýaşaýjylarynyň sözlerine görä, soňky hepdelerde şäheriň ähli ýerlerinde öý haýwanlary ýok edilipdir.
Aşgabadyň häkimiýetleri ençeme ýyl bäri eýesiz haýwanlara garşy "göreşýärler". Itler we pişikler jemagat gulluklarynyň işgärleri, şol sanda köçe süpürijiler we ýaşaýyş jaý dolandyryş edaralarynyň işgärleri tarapyndan tutulýar.
Jemagat gulluklarynyň işgärleri öz ýolbaşçylaryň haýwanlary tutmagy we ýok etmegi talap edýändigini Azatlyga birnäçe gezek habar berdiler. Arassaçylyk işgärleri her aýda diri ýa-da öli haýwanlaryň birnäçesini tabşyrmaly.
Ýaşaýyş jaý dolandyryş edaralarynyň işgärleriniň köpüsi paýtagta gazanç üçin gelen welaýat ýaşaýjylary bolup, olar maddy taýdan uly mätäçlik çekýän we işini ýitirmekden örän howatyrlanýan adamlar.
"Jemagat gulluklarda işlemek üçin şähere gelen işgärler umumy ýaşaýyş jaýynda ýer almak üçin diňe bir para bermek bilen çäklenmän, öli pişikleriň belli bir sanyny tabşyryp durmaly. Olar gaýratyny görkezýärler" - diýip jemagat gullugynyň bir işgäri aýtdy.
Häkimiýetler köçelerde haýwanlary, şol sanda eýesi bolan öý haýwanlaryny gözläp tutmak boýunça yzygiderli çäre geçirýärler. Bu iş baýramçylyklarda has hem güýçlenýär.
"Bu ýerde her bir baýramçylyk alabaýlar üçin ganly güne öwrülýär. Baýramçylyk bolmadyk wagty hem şeýle. Ýaňy-ýakynda itleriň gizlenýän ýeri bolan işlemeýän köne gonamçylykda köp it, şol sanda kiçi güjükli owadan bir alabaý iti ýok edildi" - diýip, aşgabatly ýaşaýjy gürrüň berdi.
Türkmen häkimiýetleri itleriň we pişikleriň rehimsiz tutulmagy we ýok edilmegi barada resmi düşündiriş bermän gelýärler.
Azatlygyň Türkmenistandaky habarçylarynyň belleýşi ýaly, soňky ýyllarda ýurtda türkmen alabaýyň ösýän kultynyň fonunda itleriň ýok edilmegi hasam güýçlenipdir.
2020-nji ýylda Aşgabatda alabaý itiniň äpet altyn heýkeli dikildi. 2021-nji ýylda ýurtda alabaý itiniň baýramçylygy döredildi we "Halk itşynasy" we "Hormatly itşynasy " atlary döredildi. Ýurduň “Hormatly itşinasy" adyna ilkinji bolup häzirki prezident Serdar Berdimuhamedow eýe boldy. Bu ady oňa şol döwürde döwlet baştutany bolan kakasy Gurbanguly Berdimuhamedowyň özi dakdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.