Aşgabatda azyk önümleriniň hili we bahasy ilatda alada döredýär
Şu günler paýtagtyň döwlet söwda nokatlarynda ýumurtga satuwda bolan wagtynda adam başyna 30-dan satylýar. Emma bu azyk önüminiň bahasy soňky hepde 25% ýokarlanypdyr.
"Dükanlarda täze ýylyň öňýany we ýylyn başynda dükanlarda her ele 30 sany towuk ýumurtgasynyň 30 manatdan satmagyna gözegçilik saklandy. Ýöne bazarlarda ýene-de 30 sany towuk ýumurtgasynyň bahasy 40 manada çenli ýokarlandy" diýip, habarçymyz aýdýar.
Azatlyk bilen anonimlik şertinde gürrüňdeş bolan söwda işgärleri ýumurtganyň bahasynyň ýokarlandyrylmagyna önümiň hyrydarynyň köpelmeginiň täsir edendigini aýdýarlar.
"Ilatyň gündelik zerurlygy bolan towuk ýumurtgasynyň hyrydary diňe alyjylardan ybarat däl. Döwlet hem hususy çörek we çörek önümlerini taýýarlaýan kärhanalar hem günde öz önümçiliginde müňlerçe sany ýumurtgany ulanýarlar. Tortlar, süýji gatlaklylar, kökeler ýaly tagamlarda ýumurtga köp mukdarda ulanylýar" diýip, söwdegär aýdýar.
Azatlygyň habarçylary dekabryň aýagynda we Täze ýyl baýramçylygyna gabat ýurtda azyk söwdasyny kadalaşdyrmak boýunça käbir çäreleriň amala aşyrylandygyny, hususan-da döwlet dükanlarynda bazardakysyndan arzanrak bahadan azyk önümleriň peýda bolandygyny habar beripdi.
"Hökümetiň zerur gündelik azyk harytlarynyň bahasynyň öňki nyrhynda saklamak barada administratiw görkezmesi we onuň berjaý edilişi netijesiz bolýar" diýip, Aşgabatdaky habarlarymyzyň biri söwda işgärine salgylanyp, 24-nji ýanwarda habar berdi.
Başga bir habarçymyzyň 22-nji ýanwarda beren maglumatynda paýtagtda möhleti geçen günebakar ýagynyň satuwda peýda bolandygy gürrüň berdi.
Adatça hyrydary köp bolýan günebakar ýagynyň tekjelerde peýda bolmagy we ozalkysyndan arzanlandyrylan bahadan hödürlenmegi alyjylarda sorag döretdi.
Azatlyk Radiosynyň habarçylary munuň sebäpleri bilen gyzyklanyp, söwda pudagyndaky çeşmelere ýüz tutdy.
"Aşgabadyň söwda ministrliginiň garamagyndaky döwlet dükanlarynda Russiýa Federasiýasynda öndürlen we şu ýylyň ýanwar aýynda ýaramlylyk möhleti gutaran ýa-da gutaryp barýan ýag satylýar. Plastik gaplardaky bu günebakar ýagyny gyssagly arzan bahadan, ýagny 16 manat 50 teňňeden ilata satmak tabşyryldy" diýip, çeşme aýdýar.
Söwda işgäriniň sözlerine görä, ýagyň möhleti geçen hem bolsa onuň hyrydary köp.
"Alyjylar mümkin boldugyndan köpräk satyn almagy makul bilýärler. Käbirler ýagyň gymmatlamagyndan howatyrlanýarlar" diýip, söwda işgäri aýtdy.
Türkmensitanda ösümlik ýagy ilatyň azyk rasionynyň düýbüni tutýar.
Günebakar, pagta ýagynyň gytçylygy ýyllar boýy saklanýar, käte has güýçlenýär. Geçen ýylyň güýz aýlarynda günebakar ýagy tas bir aýa golaý waglap satuwda bolmady. Soňra birnäçe esse gymmat bahadan satyldy.
Türkmenistanda 7 ýyla golaý wagt bäri yzygiderli dowam edýän azyk krizisinde ýaşaýan hem-de azyk gytçylygyna we gymmatçylygyna öwrenişen ilat köpçüligi möhleti geçen we pes hilli azyk önümlerini satyn almakdan saklanmaýar.
"Maddy ýagdayy pes hojalyklar möhleti geçen hem bolsa, häzirki pursatdan peýdalanyp, köpräk ýag satyn alýarlar. Olar ozleriniň 27, 30 manatdan günebakar ýagyny satyn almaga maddy ýagdaýlarynyň ýokdygyny aýdyp, 'ajal ýetmese möhleti geçen ýagdan olmeris' diýip özlerine göwünlik berýärler" diýip, Azatlygyň paýtagtdaky çeşmeleriniň biri gürrüň berdi.
Geçen hepdede Balkan welaýatynda günebakar ýagynyň gytçylygy ýene döredi.
Birnäçe günüň dowamynda welaýatyň döwlet dükanlarynda günebakar ýagy düýpden satylmady.
Azatlygyň habarçysy Balkanabat, Türkmenbaşy we Bereket şäherlerindäki we obalardaky dükanlara aýlanyp gördi we olaryň hiç birinde günebakar ýagyny tapmady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.