ÝB-Türkmenistan hyzmatdaşlygy maslahatlaşdy, gazanylan üstünlikleri öwdi
Adam hukuklary babatynda aýdylanda, metbugat ýygnagynda Türkmenistanyň hiç bir döwletiň raýaty bolmadyk adamlaryň sanyny azaltmak, mejbury zähmeti we adam söwdasyny ýok etmek meselelerindäki öňegidişligi bellendi. ÝB kazyýet we türme ulgamlaryndaky özgertmeleri, jyns deňligini we maýyplaryň hukuklarynyň üpjün edilmegini ösdürmek üçin öz goldawyny teklip etdi.
Bu çäre ýerli we halkara habar beriş serişdelerini, türkmen ministrlikleriniň we edaralarynyň wekillerini, ÝB tarapyndan maliýeleşdirilýän taslamalaryň koordinatorlaryny bir ýere jemläp, ÝB bilen Türkmenistanyň arasyndaky berk hyzmatdaşlygy görkezdi diýip, resmi habarda aýdylýar.
Ýewropa Bileleşiginiň Türkmenistandaky ilçisi Beata Peksa Türkmenistanyň Daşary işler ministrligine, beýleki ministrliklere we edaralara, şol sanda ÝB tarapyndan maliýeleşdirilýän taslamalaryň wekillerine netijeli hyzmatdaşlyk we bilelikdäki başlangyçlaryň üstünlikli durmuşa geçirilmegine goşan goşantlary üçin minnetdarlyk bildirdi.
Onuň tassyklamagyna görä, olaryň tagallasy ÝB-Türkmenistan hyzmatdaşlygyny pugtalandyryp, durnukly ösüşdäki, sebitara baglanyşykdaky we öz içine alyjy ösüşdäki umumy maksatlary ilerletdi.
Türkmenistanyň daşary işler ministriniň orunbasary Mähri Bäşimowa ÝB-niň berýän goldawyna minnetdarlyk bildirip, Türkmenistanyň ikitaraplaýyn gatnaşyklary pugtalandyrmakdaky ygrarlylygyny ýene bir gezek tassyk etdi.
“Turkmen.news” neşiri bu habar barada çap eden synynda resmi çärede agzalan üstünlikleriň käbiriniň optimizm döredýändigini, ýöne beýlekileriniň sorag döredýändigini belledi.
Garaşsyz neşiriň ýazmagyna görä, goňşy ýurtlar bilen aradaky ulag gatnawy, ýollaryň ýagdaýy, özüňi üzňeleşdirme, howa goýberilýän zyýanly gazlar, mejbury zähmet, hereket azatlygynyň çäklendirilmegi we beýleki adam hukuklary meseleleri, adam gaçakçylygy baradaky habarlar Türkmenistana mahsus bolmagynda galýar.