Gyrgyzystan salgyt syýasatyny ýumşadýar: amnistiýa yglan edildi, ulag salgydy ýatyryldy
Hökümet 2022-nji ýylyň 1-nji ýanwaryna çenli tölenmedik salgyt tölegleriniň ählisini "geçýär". Salgyt tölemäge degişli bolan 217 müň guramanyň 8,5 milliard som (100 million dollara golaý) bergisiniň geçilmegine garaşylýar.
Ýurtda transport, ulag salgydy ýatyrylýar, bu görkezme prezident Sadyr Žaparowyň kararynda berildi. Bu salgydyň ýerine, şu ýyldan başlap, satylan her litr benzin we dizel ýangyjyndan bir som möçberinde goşmaça töleg alnar. Hökümet bu çäräni ýollary abatlamak üçin serişde ýetmezçiligi bilen düşündirdi.
Oba hojalyk ýerlerinden peýdalanylandygy üçin salynýan salgyda 2022-nji ýylda girizilen moratoriýanyň möhleti uzaldyldy. Bu çäre oba hojalyk önümlerini öndürijilere goldaw bermek we daýhanlaryň gerdenine düşýän agramy ýeňilleşdirmek üçin wagtlaýyn ýeňillik hökmünde girizildi. Şeýlelikde, daýhanlar 2031-nji ýyla çenli ýerden peýdalanandygy üçin salgyt tölemekden boşadylar.
Hökümet salgyt gullugyna kärhanalaryň işini 2022-nji ýyla çenli berlen hasabatlar esasynda barlamagy gadagan etdi.