HRW Gazagystanyň DIM-iniň Azattygyň žuranalistlerine akreditasiýa bermezlik kararyny tankytlady

Human Rights Watch (HRW) guramasy Gazagystanyň Daşary işler ministrliginiň Azatlygyň Gazak gullugynyň, ýagny Radio Azattykyň žurnalistlerine akkreditasiýa bermezlik kararyny tankytlady.

Adam hukuklaryna gözegçilik edýän gurama 22-nji iýulda ýaýradan beýanatynda muny “garaşsyz metbugata garşy örän howply hüjüm” diýip, häsiýetlendirdi. Beýanatda ministrligiň bu kararynyň Gazagystanda söz azatlygyna howp salýandygy we halkara derejede kabul eden adam hukuklary boýunça borçnamalarynyň bozulmagyna sebäp bolýandygy nygtalýar.

“Azat Ýewropa/Azatlyk Radiosynyň žurnalistlerine wakalary erkin beýan etmäge mümkinçilik berilmezligi, bu Gazagystanyň garaşsyz sesleri sem etmek ugrunda edýän synanşyklarynyň howply täze derejesidir” diýip, Human Rights Watch guramasynyň Ýewropa we Merkezi Aziýa boýunça direktory Hýu Wilýamson aýtdy.

Gazagystanyň Daşary işler ministrligi Azattygyň 16 žurnalistine akkreditasiýa bermegi ret etdi. Ministrlik bu kararyny ýurduň “Metbugat serişdeleri hakyndaky” kanunynyň 30-njy maddasynyň 4-nji bendi bilen esaslandyrýar. Oňa görä, daşary ýurt metbugat serişdelerine we daşary ýurt žurnalistlerine akkreditasiýasyz professional žurnalist işi bilen meşgullanmak gadagan edilýär.

Azat Ýewropa/Azatlyk Radiosynyň Gazagystandaky wekiliýeti bu kararyň kanuna garşy gelýändigini belläp, kazyýete ýüz tutdy. Arzada Daşary işler ministrligine akkreditasiýa resminamalarynyň wagtynda tabşyrylandygy bellenilýär.

17-nji iýulda Daşary işler ministrligi suddaky parahatçylykly ylalaşyk teklibini ret etdi.

Kazyýet diňlenişiginiň senesi entek bellenilmedi.