Çiygoz: Rusiye memuriy sıñırda qırımlılarnıñ keçişini sıñırlap, basqını quvetleştire
Rusiye Qırım ve Herson vilâyetiniñ memuriy sıñırında qırımlılarnıñ Ukraina pasportları boyunca keçmesini sıñırlap, basqını quvetleştire.
Bu aqta iyülniñ 22-nde Hersondaki matbuat konferentsiyasında Ukraina halq deputatı, Qırımtatar Milliy Meclisiniñ reis muavini Ahtem Çiygoz ayttı, dep bildire Qırım.Aqiqat mühbiri.
«Birisi koronavirusnen bağlı, kiriş sıñırlandı, dep ayta. Asılında daa telâşlı bir şey, çünki rusiyelileriniñ vatandaşlarımıznıñ memleketniñ esas qısmına Ukraina pasportlarınen kelmesini imkânsız yapmaq niyetlerini bilemiz. Şimdi Qırımğa qaytqan balalarımızğa berilgen qarar bar. Anda qayd etilgenine köre, soñki memuriy sıñırımıznı keçmek imkânından faydalandılar. Vatandaşlarımıznıñ Ukraina ile canlı bağlarını sıñırlamaq, sıfırğa ketirmek – Rusiyeniñ esas vazifesidir, çünki bu canlı bağımız, iç problemlerimizge baqmadan, insanlarımıznıñ Ukraina Qırımnı azat etecegine işançını quvetleştire», – dedi Çiygoz.
Ukraina Tış işler naziriniñ birinci muavini Emine Ceppar Rusiye FSBsiniñ sıñır idaresi memuriy sıñırda bergen vesiqanı derc etti.
«Qırım aq qorçalayıcı gruppasınıñ» bildirgenine köre, işğal etilgen Qırım ve Herson vilâyetiniñ memuriy sıñırında yarımada kirişinde FSB sıñır hızmetiniñ hadimleri qırımlılardan Rusiye pasportını köstermelerini talap ete. Pasportı olmağanlarğa memuriy ceza qararı yazıla.
İyül ayınıñ başında işğal altındaki Qırımnıñ Rusiye FSBsiniñ sıñır idaresi bildirdi ki, yarımadada qayd etilgen qırımlılar memuriy sıñırnı Ukraina pasportınen keçmege tırışsa, para cezasını alacaq. Ukraina işğal etilgen Qırımda berilgen Rusiye pasportlarını tanımay ve esas Ukrainağa olarnen kirmege mümkün degil.
Ukraina Tış işler nazirligi, Rusiye qırımlılarnıñ areket serbestligini sıñırlap, halqara uquqnı boza.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».