Aqyarda bir künde eki COVID-19 hastası qayd etildi, bir patsiyent öldi - akimiyet
Avgustnıñ 13-üne qadar Aqyarda eki yañı COVID-19 hastası qayd etildi. Bunı şeerniñ rusiyeli akimiyetinde bildireler.
"Hastalarnıñ birisi - raatlanıcı, o şahsiy laboratoriyada test tapsırıp, neticesini almazdan şeerden ketti. Daa bir hasta - yerli sakin, onıñ hastalıqqa oğrağan yeri belgilene", - denile beyanatta.
Müessisede 81 yaşındaki aqaynıñ ölümi aqqında aytıp berdiler, onıñ da koronavirus hastalığı bar edi.
"Onıñ diagnozı daa sag olğanda tasdıqlandı. Hastalıqnıñ başqa hastalıqlar müşküllerştirdi", - denile beyanatta.
Akimiyetniñ malümatına köre, şimdilik hastahanelerde 351 adam baqıla, infektsiya hastahanesinde 164 adam bukuna, 9-ıncı şeer hastahanesinde - 129 yata, yaşağan yerlerinde 457 adam baqıla.
Şeer akimiyetiniñ statistikasına köre, yılnıñ başından berli Aqyarda yañı koronavirus infektsiyasınen 401 adam hastalandı. 325 adam yahşı oldı, 12 adam vefat etti.
Tünevin Qırımda 42 yañı koronavirus adisesi qayd etildi.
Umumen, akimiyetniñ malümatına köre, Qırımda 1637 yañı koronavirus hastası qayd etildi. 82-si çetelden keldi, 112-si qomşu Rusiyeden kelgenler ve olarnen alâqada olğanlar. 1133 insan yahşı oldı, 18 hasta koronavirustan vefat etti.
Aqyarda 399 insan koronavirus yuqunçına oğradı, 323 kişi tüzeldi, 11 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.